Saturday, May 9, 2026

Eger bizler tek bul dúnyadaǵı ómirimizde ǵana Masiyxtan úmit etetuǵın bolsaq, onda bizler hámme adamlar ishindegi eń ayanıshlı adamlar bolǵanımız.

1 Korinfliler 15:19

Muxaddes Jazıwda aytılǵanday: «Kóz kórip, qulaq esitpegen, Adamnıń oyına kirip te shıqpaǵan nárselerdi, Quday Ózin súyetuǵınlar ushın tayarlap qoyıptı». Biraq, Quday bunı bizlerge Óziniń Muxaddes Ruwxı arqalı ashıp berdi. Óytkeni Muxaddes Ruwx hámme nárseni, hátte, Qudaydıń tereń oy-pikirlerin de biledi.

1 Korinfliler 2:9-10

Haqıyqat sózin, yaǵnıy qutqarılıw haqqında Xosh Xabardı esitip, Masiyxqa isengenińizde, sizler de wáde etilgen Muxaddes Ruwx penen mórlenip, Qudayǵa tiyisli boldıńlar. Qudayǵa tiyisli bolǵan bizlerdiń tolıq qutqarılıwımızǵa deyin bul Muxaddes Ruwx – Qudaydıń bizlerge wáde etken miyrasınıń kepili. Bulardıń hámmesi bizlerdiń ullı Qudaydı alǵıslawımız ushın boldı.

Efesliler 1:13-14

Iysa oǵan: – Sen Meni kórgenlikten isendiń. Biraq, kórmey isengenler qanday baxıtlı! – dedi.

Yuxan 20:29

Sizler Masiyxtı kórmegen bolsańız da, Onı súyesizler. Házir Onı kóre almasańız da, Oǵan isenip, sóz benen aytıp jetkiziwge qıyın bolǵan bir ájayıp hám ullı quwanısh penen shadlanbaqtasızlar. Sebebi isenimińizdiń nátiyjesine, yaǵnıy janlarıńızdıń qutqarılıwına erisesizler.

1 Petr 1:8-9

Óytkeni bizler kózge kórinetuǵın nárselerge emes, al isenimimizge súyenip jasaymız.

2 Korinfliler 5:7

Solay etip, usı bekkem isenimińizdi joytpańlar. Óytkeni ol ushın alatuǵın sıyıńız úlken.

Evreyler 10:35