Monday, April 7, 2025

Olar azap shekkende, Ol qosılıp qıynaldı, Onnan kelgen perishte olardı azat etti. Olardı Ol súyispenshiligi hám miyrimi menen qutqardı. Ázelden olardı qolına kóterip keldi.

Iyshaya 63:9

Apalı-sińlili Iysaǵa: «Iyem, Seniń jaqsı kóretuǵın adamıń awırıp atır», – dep xabar jiberdi.

Yuxan 11:3

Biraq, Iyemiz maǵan: «Saǵan bergen miyrimim jeterli. Sebebi Meniń qúdiretim hálsizlik arqalı tolıq kórsetiledi», – dedi. Sonlıqtan Masiyxtıń qúdireti mende bolsın dep, men hálsizliklerime ele de kóbirek quwanıp, olar menen maqtana beremen.

2 Korinfliler 12:9

Maǵan kúsh-quwat beretuǵın Iysa Masiyx penen birge hámme nárseni isley alaman.

Filipliler 4:13

Sonlıqtan ruwxımızdı túsirmeymiz. Bizlerdiń kórinetuǵın denemiz tozıp baratırǵan bolsa da, ishki dúnyamız kúnnen-kúnge jańalanıp atır.

2 Korinfliler 4:16

Sebebi sizlerdiń shayırlarıńızdıń geybirewleri: «Bizler Onıń urpaǵımız», – dep aytqanınday, bizler Ol arqalı jasaymız, háreket etemiz hám barmız.

Elshiler 17:28

Ol haldan tayǵandı hállendirip, Mádetsizlerdiń kúshine kúsh qosadı. Hátte, jaslar da sharshap, talıǵadı, Jas jigitler de súrnigip, jıǵıladı. Biraq Jaratqan Iyege úmit baylaǵanlar, Jańadan kúsh aladı. Olar búrkit kibi qanat jayadı. Juwırsa da, sharshamaydı, Jortsa da, hesh talıqpaydı.

Iyshaya 40:29-31

Ázelden bar bolǵan Quday seniń panańdur, Seni Ol Óziniń máńgilik qollarında alıp júrer. Dushpanlarıńdı aldıńnan quwıp shıǵarıp, Saǵan: „Olardı qırıp tasla!“ – dep aytadı.

Nızamnıń qaytalanıwı 33:27