Thursday, April 3, 2025

Siondaǵı gúnakarlar qorqıwǵa túsip, Qudaysızlardı titirew biylep aldı. Olar bılay deydi: «Jalmaytuǵın ottıń janında qaysısımız jasay alamız? Máńgi janıp turǵan jalın janında qaysısımız ornalasa alamız?»

Iyshaya 33:14

Ishimizden ózimizdi ólimge húkim etilgendey sezdik. Biraq bul ózlerimizge emes, al ólilerdi tiriltetuǵın Qudayǵa súyeniwimiz ushın boldı. 10-11 Quday bizlerdi usınday úlken ólim qáwpinen qutqardı hám ele de qutqara beredi. Sizlerdiń duwalarıńızdıń járdeminde Quday bizlerdi ele de qutqara beredi dep, bizler Onnan úmit etemiz. Kóp adamlardıń etken duwalarına Quday juwap berip, bizlerdi qutqarǵanlıqtan, kópler bizler ushın Qudayǵa shúkirlik bildiredi.

2 Korinfliler 1:9-10

Sebebi gúnanıń tólemi – ólim, al Qudaydıń sıyı – Iyemiz Masiyx Iysa arqalı beriletuǵın máńgilik ómir.

Rimliler 6:23

Tiri Qudaydıń qolına túsiw qanshelli qorqınıshlı!

Evreyler 10:31

Solay etip, bizler Iyemizden qorqıwdıń ne ekenin bilgenimiz sebepli, adamlardı aqıllandırıwǵa háreket etemiz. Bizlerdiń qanday ekenligimiz Qudayǵa ayan. Bizlerdiń qanday ekenligimizdi sizler de jaqsı biletuǵınıńızdan úmit etemen.

2 Korinfliler 5:11

Qudaydıń sózin járiyala. Zamannıń qolaylı yamasa qolaysız bolıwına qaramay, bul xızmetti dawam et. Adamlarǵa tolıq sabırlılıq penen tálim berip, áshkarala, jolǵa sal hám aqıl-násiyat et.

2 Timofey 4:2

Men, Iysa Masiyxtıń qulı hám Yaqıptıń tuwısqanı Yahudadan, Ákemiz Quday tárepinen shaqırılǵanlarǵa sálem! Ákemiz Quday sizlerdi súyedi hám Iysa Masiyxtıń Ózi sizlerdi saqlap kelmekte. Sizlerge miyrim-shápáát, tınıshlıq hám súyispenshilik mol-mol etip berilsin! Súyikli tuwısqanlarım! Bizlerge ortaq bolǵan qutqarılıwımız haqqında jazıwdı júdá qálegen edim. Endi muxaddeslerge birotalaǵa berilgen Iysaǵa degen isenim ushın gúresiń dep, sizlerge násiyat etip jazıwǵa májbúr boldım. Sebebi arańızǵa ayırım qudaysız adamlar jasırın kirip alǵan. Olar Qudaydı miyrimli dep, Onıń miyriminen buzıqshılıq qılıw ushın paydalanadı, jalǵız Húkimdarımız hám Iyemiz bolǵan Iysa Masiyxtı tán almaydı. Ondaylardıń jazası ázelden-aq jazılıp qoyılǵan. Bulardıń hámmesinen álle qashan xabarıńız bolsa da, men sizlerge esletip qoymaqshıman: Iyemiz Óz xalqın Mısırdan qutqardı, biraq sońınan isenbeytuǵınlardı nabıt etti. Sonday-aq, óz mártebe-biyligine qanaat etpey, mákanın taslap ketken perishtelerdi de ullı jaza kúninde húkim etiw ushın máńgige baylap, qarańǵılıqqa qamap qoyıptı. Bularǵa uqsap, Sodom menen Gomora qalaları hám olardıń átiraplarındaǵı qalalar da buzıqshılıq hám tábiyǵıy emes jınısıy haramılıq isledi. Máńgilik otta janıw jazasın alǵan bul qalalar adamlarǵa eskertiw boldı. Sol sıyaqlı, arańızǵa kirgen bul adamlar da qıyalparazlıqqa berilip, óz denelerin iplaslaydı hám Qudaydıń biyligin mensinbey, perishtelerdi mazaq etedi. Hátte, bas perishte Mixail da Muwsanıń denesi haqqında shaytan menen tartısqanda, onı ǵarǵap húkim etiwge batılı barmay, tek: «Jaratqan Iyeniń Ózi saǵan sazayıńdı bersin», – degen edi. Biraq bul adamlar ózleri túsinbeytuǵın nárselerdi mazaq etip, sanasız haywanlar sıyaqlı tek tábiyǵıy sezim boyınsha jasaǵanlıqtan nabıt boladı. Olar hásiret shegedi! Óytkeni Kainnıń jawız jolı menen barmaqta. Bilam sıyaqlı dámegóyshilikke berilgen olar Qorax sıyaqlı qozǵalań kóterip, nabıt boladı. Tek ǵana ózin oylap, qarım-qatnas keshelerińizde sizler menen birge iship-jegen bunday uyatsız adamlar qáwipli. Olar samal menen kóship júretuǵın jawınsız bultlarǵa, gúzde miywesiz qalıp ólgen, tamırı menen julıp taslanǵan tereklerge uqsaydı. Olar kóbigin shashıratqan teńizdiń qáhárli tolqınları sıyaqlı, pataslıqların átirapqa shashıratadı. Adasqan juldızlar sıyaqlı bolǵan olar ushın tas túnek qarańǵılıq máńgige tayar tur. 14-15 Adam-atanıń jetinshi áwladı bolǵan Enox usı adamlar haqqında mına payǵambarshılıqtı aytqan edi: «Mine, Jaratqan Iye hár bir adamdı húkim qılıw ushın, Qudaysız gúnakarlardıń barlıq jawız is-háreketlerin, Ózine qarsı aytılǵan barlıq jaman sózlerin áshkara etiw ushın, Óziniń mıń-mıńlaǵan perishteleri menen keledi». 16 Bul adamlar hámme waqıt nalıp, basqalarǵa kewli tolmaydı. Olar nápsiqawlıq penen is tutadı hám lapgóylik etip, óz paydası ushın basqalarǵa jaramsaqlanadı. 17 Biraq sizler, súyikli tuwısqanlarım, Iyemiz Iysa Masiyxtıń elshileri tárepinen aldın aytılǵan sózlerdi eske túsirińler. 18 Olar sizlerge: «Dúnyanıń sońǵı kúnlerinde óz nápsine berilgen, Qudaydan qorqpaytuǵın mazaq etiwshiler payda boladı», – degen edi. 19 Bunday adamlar – alawızlıq salıwshı hám Muxaddes Ruwxtan bos qalıp, óziniń gúnakar tábiyatınıń qulı bolǵan adamlar. 20 Biraq sizler, súyikli tuwısqanlarım, eń muxaddes bolǵan isenimińizdi ómirińizdiń tiykarı qılıp, jetilisip barıńlar. Muxaddes Ruwx penen duwa etińler. 21 Ózlerińizdi máńgilik ómirge eristiretuǵın Iyemiz Iysa Masiyxtıń miyrim-shápáátin kútip, Qudaydıń súyispenshiligi menen jasawdı dawam etińler. 22 Isenimde ekileniwshi ayırım adamlarǵa miyrimlilik penen qatnas jasańlar. 23 Bazılardı ottan shıǵarıp, qutqarıńlar. Jáne basqalarǵa rehimlilik kórsetińler. Degen menen, abaylı bolıńlar. Hátte, olardıń deneleriniń gúnakarlıǵı sebepli bılǵanǵan kiyimlerinen de jerkenińler. 24-25 Qutqarıwshımız bolǵan jalǵız Quday sizlerdi jıǵılıwdan saqlawǵa, Óziniń saltanatında ullı quwanısh penen minsiz qılıp turǵızıwǵa qúdiretli. Iyemiz Iysa Masiyx arqalı ázelden, házir hám máńgige, ullılıq, saltanat, kúsh-qúdiret hám húkimdarlıq Qudaydiki bolsın! Awmiyin.

Yahuda 1

Sonıń ushın, ol maǵan mınalardı aytıp berdi: – Jaratqan Iye Zerubbabel ushın mına sózlerdi ayttı: «Kúsh hám qúdiret penen emes, al Meniń Ruwxım menen tabısqa eriseseń. Bul Álemniń Jaratqan Iyesiniń sózi.

Zexariya 4:6

Sebebi Ol hámme adamlardıń qutqarılıwın hám haqıyqatlıqtı biliwin qáleydi.

1 Timofey 2:4