Rabbiy jaqın — January 23, 2025: Баслы жаратылыў 15

¹ Bul waqıyalardan soń, Jaratqan Iye Ibramǵa bılay dep ayan berdi: – Qorqpa, Ibram. Men – seniń qalqanıńman. Saǵan beriletuǵın sıylıq oǵada ullı boladı. ² Biraq Ibram bılay dedi: – Quday Iye! Sen maǵan ne bereseń? Men ele biyperzentpen-ǵo! Meniń úyim damaskli Eliezerge qaladı. ³ Sen maǵan perzent bermegeniń sebepli, úyimdegi bir xızmetshim miyrasxorım boladı. ⁴ Sonda Jaratqan Iye Ibramǵa: – Seniń miyrasxorıń ol emes, al ózińnen tuwılatuǵın balań boladı, – dedi. ⁵ Sońınan Ibramdı sırtqa shıǵarıp bılay dedi: – Aspanǵa qara! Eger juldızlardı sanay alsań, olardı sanap kór. Mine, seniń urpaqlarıń da sonday kóp boladı. ⁶ Ibram Jaratqan Iyege isendi, Jaratqan Iye isenimi ushın onı haq dep sanadı. ⁷ Sońınan Ol Ibramǵa: – Bul jerdi saǵan menshik etip beriw ushın, seni kaldeylerdiń Ur qalasınan shıǵarǵan Jaratqan Iyeń Men bolaman, – dedi. ⁸ Biraq Ibram Onnan: – Quday Iye, bul jerlerdi menshik etip alatuǵınımdı qalay bilemen? – dep soradı. ⁹ Sonda Jaratqan Iye oǵan: – Maǵan hár biriniń jası úsh jasar bolǵan qashar, eshki, qoshqar, jáne de, bir qumırı hám kepterdiń palapanın alıp kel. ¹⁰ Ibram hámmesin alıp keldi hám olardı dál ortasınan bólip, bóleklerdi bir-birine qarama-qarsı qoydı. Al quslardı bólmedi. ¹¹ Soyılǵan mallardıń denesine jırtqısh quslar ushıp kelip, qona basladı, biraq Ibram olardı quwıp jiberdi. ¹² Kún batar waqıtta, Ibram tereń uyqıǵa ketti. Sonda qorqınıshlı bir qara túnek onı qorshap aldı. ¹³ Jaratqan Iye Ibramǵa bılay dedi: «Mınanı jaqsı bilip qoy: seniń urpaqlarıń jat elde kelgindi bolıp jasaydı. Olar tórt júz jıl qulshılıqta bolıp, eziwshilik kóredi. ¹⁴ Biraq Men olardı qul etken xalıqtı jazalayman. Sonnan soń, olar sol jerden kóp mal-múlik penen shıǵıp ketedi. ¹⁵ Al sen ǵarrılıq dáwranın súrip, ólip jerleneseń hám tınıshlıq penen ata-babalarıńnıń janına barasań. ¹⁶ Seniń urpaqlarıńnıń tek tórtinshi áwladı ǵana bul jaqqa qaytıp keledi, sebebi amorlardıń gúnası ele tolıw mólsherine jetken joq». ¹⁷ Kún batıp, qarańǵılıq shókkende, ishi tútep turǵan ıdıs hám lawlaǵan jalın payda bolıp, bólingen mallardıń arasınan júrip ótti. ¹⁸ Usı kúni Jaratqan Iye Ibram menen kelisim dúzip bılay dedi: «Men seniń urpaqlarıńa Mısır dáryasınan ullı Evfrat dáryasına shekem sozılǵan jerdi, ¹⁹ yaǵnıy ken, keniz, qadmon, ²⁰ xet, periz, refa, ²¹ amor, qanan, girgash hám ebus xalıqlarınıń jerlerin beremen».

¹ Bir qansha waqıttan keyin, Quday Ibrayımdı sınadı. Quday oǵan: – Ibrayım! – dedi. Ibrayım: – Lábbáy! – dedi. ² Sonda Quday oǵan: – Ózińniń súyikli jalǵız ulıń Ísaqtı alıp, Moriya jerine bar. Ol jerde, Men saǵan kórsetetuǵın tawlardıń birinde onı qurbanlıqqa shalıp, jaǵıp jiber, – dedi. ³ Ibrayım erteńine azanda erte turıp, eshegine júklerdi arttı. Ol ózi menen birge eki xızmetshi balasın hám ulı Ísaqtı aldı. Qurbanlıq ushın otın shawıp bolıp, Qudaydıń ózine aytqan jerine barıw ushın jolǵa shıqtı. ⁴ Úshinshi kúni Ibrayım kóz taslap, aytılǵan orındı uzaqtan kórdi. ⁵ Ibrayım xızmetshilerine: – Sizler usı jerde eshek penen birge qalıńlar. Al bizler balamız ekewimiz ana jerge barıp, Qudayǵa sıyınamız hám sizlerge qaytıp kelemiz, – dedi. ⁶ Ibrayım qurbanlıq ushın shawılǵan otınlardı balası Ísaqqa arqalatıp, ózi ot penen pıshaqtı aldı. Sońınan ekewi birge júrip ketti. ⁷ Ketip baratırıp, Ísaq ákesine: – Aǵa! – dedi. – Lábbáy, ulım, – dedi Ibrayım. Ísaq onnan: – Minekey, ot hám otın bar. Biraq jandırılatuǵın qurbanlıq ushın beriletuǵın janlıq qáne? – dep soradı. ⁸ Ibrayım: – Ulım, jandırılatuǵın qurbanlıq bolatuǵın janlıqtı Qudaydıń Ózi jetkizedi, – dep juwap berdi. Solay etip, olar ekewi jolın dawam etti. ⁹ Olar Qudaydıń Ibrayımǵa aytqan jerine jetip kelgende, Ibrayım qurbanlıq orın qurıp, onıń ústine otınlardı qaladı. Keyin ulı Ísaqtı baylap, qurbanlıq orındaǵı otınlardıń ústine jatqızdı. ¹⁰ Ibrayım balasın bawızlamaqshı bolıp, pıshaqtı aldı. ¹¹ Biraq Jaratqan Iyeniń bir perishtesi aspannan dawıslap: – Ibrayım! Ibrayım! – dedi. – Lábbáy, – dedi ol. ¹² Perishte oǵan: – Balaǵa qol kóterme, oǵan hesh nárse isleme. Endi men seniń Qudaydan qorqatuǵınıńdı bildim. Sebebi sen Mennen jalǵız ulıńdı da ayamadıń, – dedi. ¹³ Ibrayım basın kóterip, putalıqqa shaqınan ilinip turǵan qoshqardı kórdi. Ol barıp, qoshqardı ákeldi de, ulınıń ornına qoshqardı qurbanlıq ushın shalıp, jaǵıp jiberdi. ¹⁴ Solay etip, Ibrayım sol orındı Yahwe-Ire dep atadı. Sonlıqtan usı kúnge deyin: «Jaratqan Iyeniń tawında jetkerip beriledi», – dep aytıladı. ¹⁵ Jaratqan Iyeniń perishtesi ekinshi ret Ibrayımǵa aspannan dawıslap ¹⁶ bılay dedi: «Jaratqan Iye bılay deydi: „Óz atım menen ant ishemen, sen bul isti islep, jalǵız ulıńdı da ayamadıń, ¹⁷ sonlıqtan Men seni ústi-ústine jarılqayman. Urpaqlarıńdı aspandaǵı juldızlar hám teńiz jaǵasındaǵı qumlar sıyaqlı ústi-ústine kóbeytemen. Seniń urpaqlarıń óz dushpanlarınıń qalalarına iyelik etedi. ¹⁸ Maǵan boysınǵanıń ushın, urpaqlarıń arqalı jer júzindegi barlıq xalıqlar jarılqanadı“». ¹⁹ Sonnan keyin, Ibrayım xızmetshileriniń janına qaytıp keldi. Olar birlikte Beer-Shebaǵa qaray ketti. Ibrayım sol jerde jasap qaldı. ²⁰ Bir qansha waqıtlardan soń, Ibrayımǵa: «Tuwısqanıń Naxorǵa hayalı Milka ullar tuwıp berdi», – degen xabar jetip keldi. ²¹ Milka tuńǵıshı Ustı, onıń inisi Buzdı, Aramnıń ákesi Kemueldi, ²² Kesedti, Xazonı, Pildashtı, Idlaftı hám Betueldi dúnyaǵa keltirdi. ²³ Al Betuelden Rebekka tuwıldı. Usı segiz uldı Ibrayımnıń tuwısqanı Naxorǵa Milka tuwıp berdi. ²⁴ Naxordıń Reuma degen toqalı da oǵan Tebax, Gaxam, Taxash hám Maaxa degen balalardı tuwıp berdi.

¹⁹ Óytkeni Ibrayım Quday ólilerdi de tirilte aladı, dep oyladı. Astarlap aytqanda, ol Ísaqtı ólimnen qaytarıp aldı.

Jaratılıs 15 · Jaratılıs 22 · Evreyler 11:19 · QrqMK22