«Hárdayım Rabbıda quwanıń. Men bunı taǵı aytaman: Quwanıń!» (Filipililerge 4:4)«Rabbıda quwanıw» jaqsı nárse. Bálkim siz bunı sınap kórgen shıǵarsız, biraq dáslep sátsiz bolǵanday kórindi. Ekinshi ret oylamań, hám alǵa umtılıń. Hátte hesh qanday quwanısh sezbey turǵanıńızda da, qádemińizde hesh qanday jeńillik, turmısıńızda hesh qanday teselli yamasa ruwxlandırıw bolmasa da, quwanıwdı dawam etiń hám «onı taza quwanısh dep biliń» (Yakob 1:2). «Kóp túrli sınawlarǵa duwshar bolǵanıńızda» (Yakob 1:2), onı quwanısh dep biliń, onnan lázzet alıń, hám Quday siziń isenimińizdi sıylaydı.
Siz aspanlıq Ákeńizdiń Óz jeńisi hám quwanıshı bayraǵın urıstıń eń aldına alıp barıwǵa ruqsat berip, keyin tınısh ǵana sheginip, siziń dushpan tárepinen tutqınǵa alınıwıńızdı yamasa jeńiliwge ushırawıńızdı kóriwine isenesiz be? HESH QASHAN! Onıń Muqaddes Ruwı siziń batır alǵa umtılıwıńızda qollap-quwatlaydı hám júregińizdi quwanısh hám maqtaw menen toldıradı. Siz júregińizdiń ishki tolıqlıq penen ruwxlanǵanın hám jańalanǵanın sezesiz.
Rabbım, maǵan Sende quwanıwdı úyret — «hárdayım quwanıshlı bolıwdı» (1 Tesalonikalılarǵa 5:16).
Kewilimiz bolmasa da qosıq aytayıq, sebebi usılayınsha biz awır ayaqlarǵa qanat beremiz hám sharshawdı kúshke aylandıramız.«Túngi yarımǵa jaqın Pawıl menen Silas Qudayǵa duwa etip, gimnler aytıp atır edi, hám basqa tutqınlar olardı tıńlap atır edi.» (Hámeller 16:25)
