Thursday, July 16, 2026

Olar jańa alǵıslaw qosıǵın aytıp bılay dedi: «Sen orama qaǵazdı alıwǵa hám bekitilgen mórlerdi buzıp ashıwǵa ılayıqlısań! Óytkeni Sen Ózińdi qurban ettiń hám hár bir urıw, til, Xalıq hám milletten shıqqan adamlardı Qudayǵa arnaw ushın, Óz qanıńdı tógip, olardıń tólemlerin ótediń. Olardı patshalıǵıńa eristirip, Qudaydıń xızmetindegi ruwxaniyler qıldıń. Olar jer júzinde patshalıq etedi».

Ayan 5:9-10

Biraq sizler Quday tárepinen tańlanǵan adamlar, Patshanıń ruwxaniyleri, muxaddes millet hám Qudayǵa tiyisli xalıqsız. Sizler ózlerińizdi qarańǵılıqtan Óziniń ájayıp nurına shaqırǵan Qudaydıń tań qalarlıq islerin járiyalaw ushın tańlandıńlar.

1 Petr 2:9

Sizler bolsa, Jaratqan Iyeniń ruwxaniyleri, Qudayımızdıń xızmetshileri dep atalasız. Sizler milletlerdiń baylıǵınan lázzet alıp, Olardan alǵan qaznalarǵa maqtanasız.

Iyshaya 61:6

Birinshi qayta tiriliwde qatnasqanlar baxıtlı hám muxaddes. Ekinshi ólimniń bular ústinen hesh qanday biyligi joq. Olar Qudaydıń hám Masiyxtıń ruwxaniyleri bolıp, Onıń menen birge mıń jıl patshalıq etedi.

Ayan 20:6

Solay etip, bizler menen birge Quday tárepinen shaqırılǵan, muxaddes tuwısqanlarım, Qudaydıń elshisi hám bas ruwxaniyi, dep ózlerimiz ashıq tán alǵan Iysa haqqında tereń oylańlar!

Evreyler 3:1

Sonlıqtan Iysa arqalı Qudayǵa úzliksiz maqtawlarımızdı qurbanlıq sıpatında usınayıq. Yaǵnıy, Onıń atına degen alǵıslarımız awzımızdan túspesin.

Evreyler 13:15

Sebebi bizler Qudaydıń dóretpesimiz. Ózi aldın ala tayarlaǵan jaqsı islerin islep jasawımız ushın, Ol bizlerdi Masiyx Iysa arqalı jarattı.

Efesliler 2:10

Eger kim de kim Qudaydıń ibadatxanasın buzsa, onı Quday uradı. Óytkeni Qudaydıń ibadatxanası – muxaddes hám sol ibadatxana sizlersiz.

1 Korinfliler 3:17