Thursday, December 4, 2025

Eger arańızdaǵı birińizdiń danalıǵı kem bolsa, hámmege saqıylıq penen, ayıplamay beretuǵın Qudaydan sorasın. Quday oǵan beredi. Biraq hesh gúmanlanbastan, isenim menen sorasın. Óytkeni gúmanlanǵan adam samal menen shayqatılıp tınıshsızlanǵan teńiz tolqınına uqsaydı.

Yaqıp 1:5-6

Shın júrekten Jaratqan Iyege úmit bayla, Óz aqıl-parasatıńa súyenip júrme. Islegen hár bir isińde Jaratqan Iyeni tanıp bil, Ol seniń jollarıńdı tuwrılap turar.

Hikmetler 3:5-6

Máńgilik Patshaǵa, ólmeytuǵın hám kórinbeytuǵın jalǵız Qudayǵa máńgi-baqıy húrmet hám dańq bolsın! Awmiyin.

1 Timofey 1:17

Ózińdi danıshpanman dep sanama, Jaratqan Iyeden qorq, jamanlıqtan awlaq júr.

Hikmetler 3:7

Sonda men: – Haw, Quday Iye! Men qalay sóylewdi bilmeymen, júdá jaspan, – dedim. Biraq Jaratqan Iye maǵan bılay dedi: – «Men jaspan», – deme. Seni kimge jibersem, hámmesine barasań, ne buyırsam, sonı aytasań. Olardan qorqpa, seniń menen birge bolıp, seni qutqaraman, – dedi Jaratqan Iye.

Eremiya 1:6-8

Sol kúni Mennen hesh nárse soramaysızlar. Sizlerge shının, haqıyqatın aytaman: Meniń atım menen Ákemnen ne sorasańlar da, Ol sizlerge beredi. Házirge deyin sizler Meniń atım menen hesh nárse soramadıńlar. Sorańlar, alasızlar, sonda quwanıshıńız tolı boladı.

Yuxan 16:23-24

Eger isenim menen duwa etseńler, ne sorasańlar da, hámmesin alasızlar, – dedi.

Matta 21:22