Жазған: Дж.Т. Моусон
Соның ушын, биз ҳәзир болсақ та, жоқ болсақ та, Оған мақул болыў ушын мийнет етемиз (2 Коринфлилерге 5:9)
Ҳәр қандай адамға мақул болыў ушын, сиз оны билиўиңиз керек. Ийеңиз бенен де солай. Егер сиз Оның менен көп ўақыт өткермесеңиз, Оны жақыннан ҳәм жақсы биле алмайсыз. Сиз Оның ушын жасаўыңыз керек, өзиңиз ушын емес. Егер Ол сиз ушын өлген болса, сиз жасаўыңыз ушын, сиз жасайтуғын турмыс Оның ушын болыўы керек.
Мен ҳәзир сиздиң хызметиңиз ҳаққында көп айтып атырған жоқпан, бирақ Ол сиздиң хызметиңизди қәдирлейди. Жаслардан бири турып, толық жүрек пенен қандай қымбат Қутқарыўшы тапқанын айтқанда, ҳәм жас қыз бир неше баланы жыйнап, Ол ҳаққында айтқанда, Ийе разы болады. Бирақ бул Оның көзинде толық қәдирге ийе болыўы ушын Оның менен таныслықтан келип шығыўы керек.
Ол Өз ҳаўарийлерин таңлағанда, ең дәслеп оларды ўағыз етиўге жибериў ушын емес, бәлки Оның менен бирге болыўлары ушын еди; ўағыз соның артынан келди. Биз Оның менен бирге болыўды бәринен де артық қәлегенде, Оның сүйиўи биз ушын шараптан да жақсы болғанда, биз Оған мақул боламыз. Юҳанна Ийеге мақул болды, ол Өз басын Оның көкирегине қойғанда. Ол буны еткенде, ол кәри шашы ағарған аға емес еди. Ол шәкиртлердиң ең кишиси еди, ҳәм биз анықлағанымызша, сол ўақытта 20 жастан аспаған. Ол қыйыншылық ўақтында әлемдеги ең нәзик жүрек соғатуғын сол көкиректен жубаныш тапты, ҳәм үлкен сынақ келгенде ҳәм барлық үлкен ағалар қашқанда, бул 20 жаслы жигит бир неше ҳаяллар менен Ийсаның крести жанында турды. Ҳәм Оның Ийеси Өз анасын, ең қымбат мийрасты оған исенип тапсыра алды.
Басыңызды Оның көкирегине қойың, ҳәм солай еткениңизде, сиз Оның ушын жасайсыз; сиз Оның досты боласыз ҳәм Ол сизге исене алады, ҳәм сынақ келгенде, сиз гүўалық бересиз ҳәм сиздиң хызметиңиз Оған мақул болады.
