Wednesday, August 5, 2026

Túsiniwińizge ańsat bolıw ushın, ápiwayı sózler menen aytıp atırman: burın deneńizdiń múshelerin iplaslıqqa hám nahaq islerdi islew ushın nahaqlıqqa qul qılıp baǵıshlaytuǵın edińiz, al endi muxaddes bolıwıńız ushın, olardı haqlıqqa qul qılıp baǵıshlańlar.

Rimliler 6:19

Solay etip, háy tuwısqanlarım, Qudaydıń miyrim-shápááti haqı sizlerge jalbarınaman: denelerińizdi Qudayǵa unaytuǵın muxaddes hám tiri qurbanlıq qılıp, Oǵan baǵıshlańlar. Bul sizlerdiń Quday aldındaǵı ılayıqlı xızmetińiz boladı. Bul dúnyanıń adamlarına eliklemeńler. Al Qudaydıń oy-pikirlerińizdi jańalap, Onıń sizlerdi tolıq ózgertiwine jol qoyıńlar. Sonda sizler Qudaydıń jaqsı hám minsiz erkin, yaǵnıy Oǵan neniń unaytuǵının ayırıp bilesizler.

Rimliler 12:1-2

Solay etip, kim de kim Masiyx penen baylanısqa iye bolsa, ol – jańa jaratılıs. Eski nárseler ótip ketti, minekey, endi hámmesi jańa boldı.

2 Korinfliler 5:17

Súnnetleniwdiń de, súnnetlenbewdiń de hesh qanday áhmiyeti joq, áhmiyetlisi – jańa jaratılıs bolıw. Usınday qaǵıyda boyınsha jasap atırǵanlardıń hámmesine, yaǵnıy Qudaydıń xalqına tınıshlıq hám miyrim-shápáát yar bolsın!

Galatiyalılar 6:15-16

Sonlıqtan men usını aytıp, sizlerdi Iyemizdiń atınan eskertemen: bunnan bılay, butqa tabınıwshı milletlerdiń adamları sıyaqlı, bos oy-qıyallarǵa berilip jasamańlar.

Efesliler 4:17

Biraq sizler Masiyxtı bunday qılıp tanımaǵansız. Álbette, sizler Iysa Masiyx haqqında esitkenińizden keyin, Onıń menen qatnasta bolıp, Ondaǵı haqıyqattı úyrendińler.

Efesliler 4:20-21

Qudayǵa uqsatılıp jaratılǵan, shın haqlıq hám muxaddeslikten ibarat jańa tábiyatqa bólenińler.

Efesliler 4:24