Күншилликтен сақланың

Күншиллик — жүрегимиздиң тереңине кирип кетиўи мүмкин болған жасырын қәсийет. Сонлықтан биз бундай имканияттан хабардар болыўымыз ҳәм оған қарсы сергек болыўымыз керек. Егер оның раўажланыўына жол қойылса, ол қәстан адам өлтириўге алып келиўи мүмкин. Қабылдың ағасын өлтириўиниң себеплериниң бири күншиллик болған ба екен деп ойлаймыз. Абылдың қурбанлығын Қудай қабыл етти, ал Қабылдың қурбанлығын қабыл етпеди. Биз билемиз, Ийсаның Пилатқа тапсырылыўының себеби күншиллик болған, соның ушын Ол крестке михленген: «Себеби [Пилат] бас руўханийлердиң Оны күншиллик себепли тапсырғанын билген еди» (Марк 15:10). Пабыл да яҳудийлер тәрепинен күншилликке ушыраған, олар Пабыл ўағызлаған Инжил хабарын үлкен топарлардың қабыл еткенин көргенде, оған қарсы қуўғыншылықты баслаған (Ҳаўарийлер 13:45).

Егер биз күншилликтиң жүрегимизде өсиўине жол қойсақ, оның басқа тәнлик қәсийетлерди ҳәм әмеллерди: гүнаны, алдаўды, еки жүзлилик ҳәм барлық жаман сөзлерди туўдырса, таң қалмаўымыз керек.

Бизде Яҳя шомылдырыўшы пайғамбардың гөззал үлгиси бар. Ол Мәсихтиң келиўин жәриялағанда, Мәсихтиң сандал баўларын шешиўге де ылайық емес екенин анық айтқан. Кейин Яҳяға Ийса одан да көп адамды шомылдырып атырғаны айтылғанда, оның жуўабы мынадай болған: «Ол өсиўи керек, ал мен киширейиўим керек». Яҳя шомылдырыўшы менен Ийса арасында ҳеш қандай бәсекелесиў ямаса күншиллик болмаған; Яҳя түсинип, былай деген: «Адам аспаннан берилмесе, ҳеш нәрсе ала алмайды».

Бул бизге де тийисли ҳәм оған саўғалар, хызмет, мүлк, лаўазым, шаңарақ, денсаўлық, ҳүрмет ҳәм биз ийе болған ҳәр қандай нәрсе киреди. Күншиллик етиў — Ийсаға шағымланыў, Ийса бизге берген нәрселерге қанаатланбаў — бул ҳеш қашан жүрегимизге кирмеўи керек болған нәрсе. Ийса биз ушын не жақсы екенин биледи. Биз Оған садықлық пенен хызмет етейик ҳәм басқалардың несине күншиллик етпейик.